ОТДЕЛ ПО ОБРАЗОВАНИЮ ПРУЖАНСКОГО РАЙИСПОЛКОМА
Яндекс.Метрика

VII  адкрыты абласны фестываль фальклорнага мастацтва “Радавод”

Ва ўсе часы былі людзі неабыякавыя да лёсу сваёй культуры, свайго краю. Да таго, якімі людзьмі вырастуць нашы дзеці, што панясуць яны ў будучыню і якую спадчыну пакінуць сваім нашчадкам. 17-18 мая 2019 года ў г.Пружаны адбыліся заключныя мерапрыемствы VII  адкрытага абласнога фестываля фальклорнага мастацтва “Радавод”. Арганізатарамі галоўнага фальклорнага свята вобласці сярод навучэнцаў устаноў адукацыі Брэсцкай вобласці з’яўляюцца галоўнае ўпраўленне па адукацыі Брэсцкага аблвыканкама і ўстанова адукацыі “Брэсцкі дзяржаўны абласны цэнтр маладзёжнай  творчасці”.

Навучэнцы, калектывы народнай творчасці, гурты, ансамблі, ідывідуальныя выканаўцы фальклорнага мастацтва, танцавальныя пары – выканаўцы народных побытавых танцаў, пераемнікі народнага дэкаратыўна-прыкладнога мастацтва  і традыцыйнай кухні ўстаноў агульнай сярэдняй і дадатковай адукацыі дзяцей і моладзі вобласці паказалі вынікі двухгадовых пошукаў, экспедыцый, працы па вывучэнню і перайманню традыцыйнага фальклору сваёй мясцовасці. Каб трапіць на свята фальклору, неабходна было падрыхтаваць самабытны матэрыял свайго рэгіёну, вывучыць і ведаць яго мову, песні    і танцы. Да ўдзелу ў фестывалі  былі запрошаны замежныя госці — калектывы з Польшчы, Сербіі, Расіі, якія адметна паказалі асаблівасці традыцыйнай культуры сваіх краін.

Пасля афіцыйнага адкрыцця фестываля, адбылося ўрачыстае шэсце удзельнікаў да галоўнага гістарычнага здабытка Пружанаў – парка і палаца Швыкоўскіх, дзе разгарнулася буйная творчая пляцоўка “Горад майстроў”. ДУДА «Цэнтр творчасці дзяцей і моладзі г.Пружаны» прэзентаваў падвор’е «Пружанскі млын». Выстава работ з саломкі аб’яднання па інтарэсах «Залатая саломка» пад кіраўніцтвам педагога дадатковай адукацыі Свешнікавай Натальі Вітальеўны, нібы сонечны астравок прывабліваў да сябе увагу пружанцаў і гасцей горада.

У намінацыі “Лепшы фальклорны калектыў” дыплом III ступені атрымаў гурт Ліноўскай СШ. “Лінькі” прадэманстравалі журы мясцовы абрад “Зажынкі”, падчас якога, як і належыць, ушанавалі першы сноп жыта: упрыгожылі яго чырвонай стужкай і па-ставілі ў самае пачэснае месца ў хаце – чырвоны кут. Уразілі журы і лялькі-мотанкі ў выкананні Дар’і Жышко і Аліны Шэцька з Ружанскага ШПЦ, якія ў намінацыі “Юныя майстры народнай творчасці” атрымалі дыплом III ступені. Таксама знайшлі сваіх прыхільнікаў сярод членаў журы дзяўчынкі з Шаняўской СШ, якім прысудзілі дыплом III ступені ў намінацыі “Бабуліна кухня”. Акрамя таго, журы было ўражана абрадам “Квашанне капусты”, які правялі члены фальклорнага аб’яднання СШ № 5. Капуста “прынесла” ў скарбонку дасягненняў пружанцаў дыплом II ступені. Аддзел па адукацыі Пружанскага райвыканкама атрымаў дыплом III ступені за выставу “Горад майстроў”.

У самім “Палацыку” адбылася абласная дзіцячая навукова-практычная канферэнцыя па выніках абласнога конкурса даследчых работ. Творчыя калектывы вобласці паказвалі свае здабыткі на канцэртных пляцоўках горада Пружаны і ў в.Лінава. А на галоўнай пляцоўцы разгарнуліся спаборніцтвы пар-выканаўцаў побытавых танцаў.

На навукова-практычнай канферэнцыі “Фальклорная спадчына” навучэнцы і педагогі  Брэсцкай вобласці прэзентавалі навукова-даследчыя работы, якія сталі пераможцамі конкурса даследчых работ.

Прызнацца, за два дні “Радавода” стаміліся ўсе: і арганізатары, і гледачы, і артысты. Аднак справу сваю яны давялі да канца. Арганізатары дзякавалі ўсім за дапамогу, пружанская публіка апладыравала стоячы, а юныя артысты далі абяцанне, што сабраную па крупінках бясцэнную беларускую спадчыну яны не толькі захаваюць, але і панясуць у будучыню.

Поделиться новостью:

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.